ਮੋਹਾਲੀ: ਫ਼ੌਜ ’ਚ ਅਗਨੀਵੀਰ ਦੇ ਰੂਪ ’ਚ ਕੰਮ ਕਰ ਰਹੇ ਇਸ਼ਮੀਤ ਸਿੰਘ ਉਰਫ ਇਸ਼ੂ ਦੋ ਮਹੀਨੇ ਪਹਿਲਾਂ ਛੁੱਟੀ ਲੈ ਕੇ ਘਰ ਆਇਆ ਸੀ ਪਰ ਛੁੱਟੀ ਖਤਮ ਹੋਣ ਦੇ ਬਾਅਦ ਉਹ ਡਿਊਟੀ ’ਤੇ ਨਹੀਂ ਪਰਤਿਆ, ਬਲਕਿ ਉਸਨੇ ਆਪਣੇ ਭਰਾ ਪ੍ਰਭਪ੍ਰੀਤ ਸਿੰਘ ਉਰਫ਼ ਪ੍ਰਭ ਤੇ ਦੋਸਤ ਬਲਕਰਨ ਸਿੰਘ ਨਾਲ ਮਿਲ ਕੇ ਗਿਰੋਹ ਤਿਆਰ ਕੀਤਾ ਤੇ ਗੰਨ ਪੁਆਇੰਟ ’ਤੇ ਲੁੱਟਮਾਰ ਸ਼ੁਰੂ ਕਰ ਦਿੱਤੀ। ਪੁਲਿਸ ਦੀ ਜਾਂਚ ’ਚ ਸਾਹਮਣੇ ਆਇਆ ਕਿ ਮੁਲਜ਼ਮ ਇਸ਼ਮੀਤ ਸਿੰਘ ਪੱਛਮੀ ਬੰਗਾਲ’ਚ ਡਿਊਟੀ ਤੋਂ ਛੁੱਟੀ ਲੈ ਕੇ ਆਉਂਦੇ ਸਮੇਂ ਰਸਤੇ ’ਚ ਕਾਨਪੁਰ ਤੋਂ ਦੇਸੀ ਪਿਸਤੌਲ ਖਰੀਦ ਕੇ ਨਾਲ ਲੈ ਆਇਆ ਸੀ। ਇਸ਼ਮੀਤ ਸਿੰਘ ਨਵੰਬਰ 2022 ’ਚ ਫੌ਼ਜ ’ਚ ਅਗਨੀਵੀਰ ਭਰਤੀ ਹੋਇਆ ਸੀ।ਐੱਸਐੱਸਪੀ ਡਾ. ਸੰਦੀਪ ਕੁਮਾਰ ਗਰਗ ਨੇ ਕਿਹਾ ਕਿ ਸੀਆਈਏ ਖਰੜ ਨੂੰ ਸੂਚਨਾ ਮਿਲੀ ਸੀ ਕਿ ਇਸ਼ਮੀਤ ਸਿੰਘ, ਪ੍ਰਭਪ੍ਰੀਤ ਸਿੰਘ ਤੇ ਬਲਕਰਨ ਵਾਹਨ ਚੋਰੀ ਤੇ ਲੁੱਟ ਦੀਆਂ ਵਾਰਦਾਤਾਂ ਕਰਦੇ ਹਨ ਤੇ ਫਿਰ ਚੋਰੀ ਦੇ ਇਨ੍ਹਾਂ ਵਾਹਨਾਂ ’ਤੇ ਫਰਜ਼ੀ ਨੰਬਰ ਪਲੇਟ ਲਗਾ ਕੇ ਅੱਗੇ ਵੇਚ ਦਿੰਦੇ ਹਨ। ਉਨ੍ਹਾਂ ਕਿਹਾ ਕਿ 20 ਤੇ 21 ਜੁਲਾਈ ਦੇਰ ਰਾਤ ਮੁਲਜ਼ਮਾਂ ਨੇ ਐਪ ਤੋਂ ਟੈਕਸੀ ਬੁੱਕ ਕੀਤੀ ਤੇ ਉਸ ਵਿਚ ਸਵਾਰ ਹੋ ਗਏ। ਚੱਪੜਚਿੜੀ ਪਹੁੰਚਦੇ ਹੀ ਉਨ੍ਹਾਂ ਨੇ ਟੈਕਸੀ ਡਰਾਈਵਰ ਨੂੰ ਪਿਸਤੌਲ ਦਿਖਾ ਕੇ ਉਸ ਦੀਆਂ ਅੱਖਾਂ ’ਚ ਪੈਪਰ ਸਪ੍ਰੇ ਪਾ ਦਿੱਤਾ ਤੇ ਉਸਦੀ ਟੈਕਸੀ ਲੁੱਟਣ ਲੱਗੇ। ਟੈਕਸੀ ਡਰਾਈਵਰ ਨੇ ਵਿਰੋਧ ਕੀਤਾ ਪਰ ਉਹ ਹਵਾਈ ਫਾਇਰ ਕਰ ਕੇ ਉਸਦੀ ਟੈਕਸੀ ਲੁੱਟ ਕੇ ਫਰਾਰ ਹੋ ਗਏ।ਐੱਸਐੱਸਪੀ ਨੇ ਦੱਸਿਆ ਕਿ ਪੁਲਿਸ ਨੇ ਤਿੰਨਾਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਜਾਂਚ ’ਚ ਸਾਹਮੇ ਆਇਆ ਕਿ ਤਿੰਨਾਂ ’ਚੋਂ ਦੋ ਮੁਲਜ਼ਮ ਬਲੌਂਗੀ ’ਚ ਪੀਜੀ ’ਚ ਕਿਰਾਏ ਦੇ ਕਮਰੇ ’ਚ ਰਹਿ ਰਹੇ ਸਨ। ਤਿੰਨੋਂ ਮੁਲਜ਼ਮ ਜ਼ਿਲ੍ਹਾ ਫਾਜ਼ਿਲਕਾ ਦੇ ਟਾਹਲੀਵਾਲਾ ਬੋਦਲਾ ਦੇ ਰਹਿਣ ਵਾਲੇ ਹਨ। ਮੁਲਜ਼ਮਾਂ ਤੋਂ ਲੁੱਟੀ ਗਈ ਟੈਕਸੀ, ਇਕ ਬੁਲੇਟ, ਇਕ ਐਕਟਿਵਾ, ਇਕ.315 ਬੋਰ ਦੀ ਦੇਸੀ ਪਿਸਤੌਲ ਤੇ ਦੋ ਕਾਰਤੂਸ ਬਰਾਮਦ ਕੀਤੇ ਗਏ ਹਨ।