ਭਾਦਸੋਂ : ਬੀਤੀ ਸ਼ਾਮ ਭਾਦਸੋਂ ਸ਼ਹਿਰ ਦੇ ਪ੍ਰਮੁੱਖ ਥੋਕ ਕਰਿਆਨਾ ਵਪਾਰੀ ਕਪਿਲ ਕੁਮਾਰ ਦੇ ਕਰਿਆਨਾ ਸਟੋਰ ਦੀ ਉਗਰਾਹੀ ਕਰ ਕੇ ਵਾਪਿਸ ਪਰਤ ਰਹੇ ਮੁਨੀਮ ਤਰਸੇਮ ਸਿੰਘ ਤੋਂ ਇਕ ਲੱਖ ਛਪੰਜਾ ਹਜ਼ਾਰ ਸੱਤ ਸੌ ਰੁਪਏ ਦੀ ਰਾਸ਼ੀ ਸਥਾਨਕ ਅਮਲੋਹ ਰੋਡ ‘ਤੇ ਸਵਿਫ਼ਟ ਕਾਰ ਵਿੱਚ ਸਵਾਰ ਤਿੰਨ ਲੁਟੇਰਿਆਂ ਨੇ ਘੇਰ ਕੇ ਲੁੱਟ ਲਈ ।ਪ੍ਰਾਪਤ ਜਾਣਕਾਰੀ ਅਨੁਸਾਰ ਲੁਟੇਰਿਆਂ ਨੇ ਸਕੂਟਰ ‘ਤੇ ਅਮਲੋਹ ਤੋਂ ਭਾਦਸੋਂ ਵੱਲ ਆ ਰਹੇ ਮੁਨੀਮ ਤਰਸੇਮ ਸਿੰਘ ਨੂੰ ਕਰਤਾਰ ਐਗਰੋ ਇੰਡਸਟਰੀ ਦੇ ਨਜ਼ਦੀਕ ਪਹਿਲਾਂ ਗੱਡੀ ਦੀ ਫੇਟ ਮਾਰ ਕੇ ਪਹਿਲਾਂ ਡੇਗਣ ਦੀ ਕੋਸ਼ਿਸ਼ ਕੀਤੀ ਪਰ ਮੁਨੀਮ ਵੱਲੋਂ ਸਕੂਟਰ ਰੋਕੇ ਜਾਣ ‘ਤੇ ਕਾਰ ਵਿੱਚੋਂ ਉਤਰ ਦੋ ਲੁਟੇਰਿਆਂ ਨੇ ਹੱਥੋਪਾਈ ਕਰਕੇ ਉਸਤੋਂ ਰੁਪਇਆਂ ਵਾਲਾ ਬੈਗ ਖੋਹ ਲਿਆ । ਬੈਗ ਖੋਹ ਕੇ ਕਾਰ ਸਵਾਰ ਲੁਟੇਰੇ ਨਾਭੇ ਵੱਲ ਦੌੜ ਗਏ ਤੇ ਮੁਨੀਮ ਨੇ ਅਪਣੇ ਮਾਲਕਾਂ ਨੂੰ ਨਾਲ ਲੈ ਕੇ ਥਾਣਾ ਭਾਦਸੋਂ ਵਿੱਖੇ ਵਾਰਦਾਤ ਦੀ ਇਤਲਾਹ ਦਿੱਤੀ । ਮੁਨੀਮ ਤਰਸੇਮ ਸਿੰਘ ਨੇ ਦੱਸਿਆ ਕਿ ਖੋਹੇ ਗਏ ਬੈਗ ਵਿੱਚ ਨਗਦੀ ਤੋਂ ਇਲਾਵਾ ਬੈਂਕ ਦੇ ਦੋ ਚੈੱਕ ਤੇ ਦੁਕਾਨ ਦੇ ਜ਼ਰੂਰੀ ਕਾਗਜਾਤ ਸਨ । ਇਤਲਾਹ ਮਿਲਦੇ ਹੀ ਥਾਣਾ ਭਾਦਸੋਂ ਪੁਲਿਸ ਨੇ ਸਥਾਨਕ ਲੋਕਾਂ ਦੀ ਮੱਦਦ ਨਾਲ਼ ਲੁਟੇਰਿਆਂ ਦੀ ਭਾਲ ਸੁਰੂ ਕਰ ਦਿੱਤੀ ਤੇ ਮੌਕੇ ਤੋਂ ਮਿਲੇ ਸੁਰਾਗਾਂ ਦੀ ਮੱਦਦ ਨਾਲ ਲੁਟੇਰਿਆਂ ਦੀ ਸ਼ਨਾਖਤ ਕਰ ਲਈ ਦੱਸੀ ਜਾ ਰਹੀ ਹੈ । ਤਿੰਨਾਂ ਵਿੱਚੋਂ ਇਕ ਲੁਟੇਰੇ ਨੂੰ ਜ਼ਿਲ੍ਹਾ ਸੰਗਰੂਰ ਦੇ ਸ਼ਹਿਰ ਸੁਨਾਮ ਲਾਗਿਓਂ ਕਾਬੂ ਕਰ ਲਏ ਜਾਣ ਦੀ ਵੀ ਚਰਚਾ ਹੈ ਪਰ ਇਸ ਗੱਲ ਦੀ ਅਧਿਕਾਰਤ ਪੁਸ਼ਟੀ ਹਾਲੇ ਨਹੀਂ ਕੀਤੀ ਗਈ ਹੈ ।