ਸੈਲੀ ਰੋਡ ਤੋਂ ਬੱਚੇ ਨੂੰ ਅਗਵਾਹ ਕਰਨ ਵਾਲਿਆਂ ਨੂੰ ਪਠਾਨਕੋਟ ਪੁਲਿਸ ਨੇ ਗੋਆ ਤੋਂ ਕੀਤਾ ਗ੍ਰਿਫ਼ਤਾਰ

 ਪਠਾਨਕੋਟ : ਬੀਤੇ ਦਿਨੀ ਸੈਲੀ ਰੋਡ ਤੋਂ ਛੇ ਸਾਲ ਦੇ ਬੱਚੇ ਨੂੰ ਅਗਵਾਹ ਕਰਨ ਵਾਲੇ ਮੁੱਖ ਦੋਸ਼ੀਆਂ ਨੂੰ ਪਠਾਨਕੋਟ ਪੁਲਿਸ ਨੇ ਗੋਆ ਤੋਂ ਗ੍ਰਿਫ਼ਤਾਰ ਕਰਨ ਵਿੱਚ ਸਫ਼ਲਤਾ ਹਾਸਲ ਕੀਤੀ ਹੈ। ਮਾਮਲੇ ਸਬੰਧੀ ਜਾਣਕਾਰੀ ਦਿੰਦਿਆਂ ਐੱਸਐੱਸਪੀ ਪਠਾਨਕੋਟ ਦਲਜਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਬੀਤੇ ਦਿਨੀ ਸੈਲੀ ਰੋਡ ਤੋਂ ਮਾਹਿਰ ਭੰਡਾਰੀ ਨਾਮਕ ਬੱਚੇ ਨੂੰ ਅਗਵਾਹ ਕੀਤਾ ਗਿਆ ਸੀ। ਜਿਸ ਨੂੰ ਹਿਮਾਚਲ ਪ੍ਰਦੇਸ਼ ਦੇ ਨੂਰਪੁਰ ਤੋਂ ਅਗਵਾਹ ਕਰਨ ਵਾਲਿਆਂ ਦੇ ਚੁੰਗਲ ਚੋਂ ਛਡਵਾ ਲਿਆ ਗਿਆ ਸੀ। ਉਹਨਾਂ ਦੱਸਿਆ ਕਿ ਇਸ ਮਾਮਲੇ ਦੇ ਸਬੰਧ ਵਿੱਚ ਪਹਿਲਾ ਅਵਤਾਰ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਸੀ ਅਤੇ ਜੋ ਮੁੱਖ ਦੋਸ਼ੀ ਬੱਚੇ ਨੂੰ ਕਿਡਨੈਪ ਕਰ ਕੇ ਲੈ ਕੇ ਗਏ ਸਨ, ਉਹਨਾਂ ਨੂੰ ਗੋਆ ਤੋਂ ਅੱਜ ਸਵੇਰੇ ਤੜਕ ਸਾਰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਉਹਨਾਂ ਦੱਸਿਆ ਕਿ ਅਮਿਤ ਰਾਣਾ ਅਤੇ ਰਿਸ਼ਵ ਬੱਚੇ ਨੂੰ ਸੈਲੀ ਰੋਡ ਤੋਂ ਅਗਵਾਹ ਕਰਕੇ ਲੈ ਕੇ ਗਏ ਸੀ ਜਿਸ ਤੋਂ ਬਾਅਦ ਇਹਨਾਂ ਚੱਕੀ ਪੁਲ ਹੇਠਾਂ ਜਾ ਕੇ ਆਪਣੇ ਹੋਰ ਦੋ ਸਾਥੀਆਂ ਨਾਲ ਮੁਲਾਕਾਤ ਕੀਤੀ ਜਿੱਥੇ ਇਨਾਂ ਬੱਚੇ ਨੂੰ ਉਹਨਾਂ ਦੋ ਸਾਥੀਆਂ ਦੇ ਹਵਾਲੇ ਕਰਕੇ ਆਪ ਕਿਸੇ ਹੋਰ ਥਾਂ ਵੱਲ ਨਿਕਲ ਜਾਣਾ ਸੀ ਅਤੇ ਪਰਿਵਾਰ ਵਾਲਿਆਂ ਤੋਂ ਫਰੋਤੀ ਦੀ ਮੰਗ ਕਰਨੀ ਸੀ ਪਰ ਪੰਜਾਬ ਪੁਲਿਸ, ਹਿਮਾਚਲ ਪ੍ਰਦੇਸ਼ ਪੁਲਿਸ ਅਤੇ ਲੋਕਲ ਲੋਕਾਂ ਦੀ ਮਦਦ ਨਾਲ ਬੱਚੇ ਨੂੰ ਅਗਵਾਹ ਕਰਨ ਵਾਲਿਆਂ ਦੇ ਕੋਲੋਂ ਬਚਾ ਲਿਆ ਗਿਆ ਸੀ ਪਰ ਮੌਕੇ ਤੋਂ ਇਹ ਕਿਡਨੈਪਰ ਭਜਣ ਵਿੱਚ ਕਾਮਯਾਬ ਰਹੇ ਸਨ। ਜੋ ਕਿ ਜੰਗਲ ਦੇ ਰਸਤੇ ਹੁੰਦੇ ਹੋਏ ਹਾਈਵੇ ਤੇ ਪਹੁੰਚੇ ਜਿੱਥੋਂ ਇਹ ਬੱਸ ਵਿੱਚ ਬੈਠ ਕੇ ਧਰਮਸ਼ਾਲਾ ਪਹੁੰਚ ਗਏ ਧਰਮਸ਼ਾਲਾ ਤੋਂ ਅਮਿਤ ਰਾਣਾ ਅਤੇ ਰਿਸ਼ਵ ਚੰਡੀਗੜ੍ਹ ਗਏ ਜਿੱਥੇ ਇਹ ਕੁਝ ਦਿਨ ਘੁੰਮਦੇ ਰਹੇ ਅਤੇ ਬਾਅਦ ਵਿੱਚ ਇਹ ਦਿੱਲੀ ਨਿਕਲ ਗਏ। ਜਿਸ ਤੋਂ ਬਾਅਦ ਪਠਾਨਕੋਟ ਪੁਲਿਸ ਦੇ ਅਧਿਕਾਰੀ ਨੇ ਦਿੱਲੀ ਇਹਨਾਂ ਦਾ ਪਿੱਛਾ ਕਰਦੇ ਹੋਏ ਪਹੁੰਚੇ ਪਰ ਇਹ ਦਿੱਲੀ ਤੋਂ ਸੜਕ ਦੇ ਰਸਤੇ ਹੁੰਦੇ ਹੋਏ ਗੋਆ ਪਹੁੰਚ ਗਏ। ਗੋਆ ਵਿੱਚ ਇਹਨਾਂ ਨੇ ਕੁਝ ਟਰਾਂਜੈਕਸ਼ਨ ਕੀਤੀਆਂ ਜਿਸ ਦੀ ਮਦਦ ਨਾਲ ਇਹਨਾਂ ਨੂੰ ਟਰੈਕ ਕੀਤਾ ਗਿਆ। ਉਹਨਾਂ ਦੱਸਿਆ ਕਿ ਅਮਿਤ ਰਾਣਾ ਅਤੇ ਰਿਸ਼ਵ ਦੀ ਲੋਕੇਸ਼ਨ ਪਤਾ ਲੱਗਦਿਆਂ ਹੀ ਦਿੱਲੀ ਤੋਂ ਇੰਸਪੈਕਟਰ ਮਨਦੀਪ ਸਲਗੋਤਰਾ ਅਤੇ ਉਨਾਂ ਦਾ ਇੱਕ ਸਾਥੀ ਹਵਾਈ ਜਹਾਜ਼ ਦੇ ਜਰੀਏ ਰਾਤ ਨੂੰ ਗੋਆ ਪਹੁੰਚ ਕੇ ਅਤੇ ਗੋਆ ਪੁਲਿਸ ਦੀ ਮਦਦ ਨਾਲ ਇਹਨਾਂ ਦੋਨਾਂ ਦੋਸ਼ੀਆਂ ਨੂੰ ਗੋਆ ਤੋਂ ਬੱਸ ਵਿੱਚ ਜਾਂਦੇ ਹੋਏ ਰਸਤੇ ਤੋਂ ਗ੍ਰਿਫਤਾਰ ਕੀਤਾ ਗਿਆ। ਉਹਨਾਂ ਦੱਸਿਆ ਕਿ ਰਿਸ਼ਵ ਦਾ ਦੁਬਈ ਦਾ ਵੀਜ਼ਾ ਵੀ ਆ ਗਿਆ ਸੀ ਅਤੇ ਇਹ ਦਿੱਲੀ ਵਿੱਚ ਆਪਣਾ ਵੀਜ਼ਾ ਲੈਣ ਵੀ ਗਿਆ ਸੀ ਪਰ ਪੰਜਾਬ ਪੁਲਿਸ ਦੀ ਟੈਕਨੀਕਲ ਟੀਮ ਵੱਲੋਂ ਇਸਦੇ ਵੀਜ਼ੇ ਨੂੰ ਵੀ ਟਰੈਕ ਕਰ ਲਿਆ ਗਿਆ ਅਤੇ ਸਾਰੇ ਹੀ ਅੰਤਰਰਾਸ਼ਟਰੀ ਹਵਾਈ ਅੱਡਿਆਂ ਤੇ ਇਹਨਾਂ ਦੋਨਾਂ ਸਬੰਧੀ ਜਾਣਕਾਰੀ ਵੀ ਦੇ ਦਿੱਤੀ ਗਈ ਜੇਕਰ ਇਹ ਦੋਨੋਂ ਦੇਸ਼ ਤੋਂ ਬਾਹਰ ਜਾਣ ਦੀ ਵੀ ਕੋਸ਼ਿਸ਼ ਕਰਦੇ ਤਾਂ ਇਹਨਾਂ ਨੂੰ ਗਿਰਫਤਾਰ ਕਰ ਲਿਆ ਜਾਂਦਾ। ਐਸਐਸਪੀ ਪਠਾਨਕੋਟ ਨੇ ਦੱਸਿਆ ਕਿ ਅਮਿਤ ਰਾਣਾ ਅਤੇ ਰਿਸ਼ਵ ਦੀ ਕੁਝ ਲੋਕ ਮਦਦ ਵੀ ਕਰ ਰਹੇ ਸਨ ਅਤੇ ਉਨਾਂ ਨੂੰ ਵੀ ਜਲਦ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।